Ерте араласу орталығы – баланың жарқын болашағына алғашқы қадам
Емханамыздың құрылымдық бөлімшесі болып табылатын Ерте араласу орталығы (ЕАО) 0–3 жас аралығындағы дамуында ауытқуы бар немесе даму қаупі бар балаларға кешенді медициналық, әлеуметтік және психологиялық-педагогикалық көмек көрсетеді.
Орталықтың негізгі мақсаты – баланың дамуындағы ерекшеліктерді ерте анықтап, уақытылы қолдау көрсету арқылы мүгедектіктің алдын алу, даму әлеуетін барынша арттыру және отбасының өмір сапасын жақсарту.
ЕАО-да келесі бағыттар бойынша жұмыс жүргізіледі:
- баланың дамуындағы ауытқуларды ерте анықтау;
- кешенді бағалау жүргізу;
- жеке араласу жоспарын әзірлеу және жүзеге асыру;
- түзету-дамыту қызметтерін көрсету;
- ата-аналарды оқыту және сүйемелдеу.
Жұмыс мультидисциплинарлық команда арқылы жүзеге асырылады. Баламен дәрігер, психолог, логопед, дефектолог және басқа да мамандар бірлесе жұмыс істейді.